Novitads
<< enavos
Cuira: «Haus der Chöre» va enavos tar la visiun
L’Uniun «Singstadt Chur» vul dar in dachasa als chors da Cuira e conturns. Cun ina chasa cul num «Haus der Chöre» duai vegnir creà in lieu d’inscunter per indigens e giasts. Er d’ina «Volks-CHOR-Hochschule» vegn scrit sin la pagina d’internet da l’uniun. In lieu perquai ha l’uniun er schon chattà: la chasa «Haus zum Arcas». Quel bajetg en la citad veglia da Cuira stat dapi in temp vid, vegn renovà e duai silsuenter vegnir nizzegià per in intent cultural. Tar la concurrenza d’ideas da la citad da Cuira è il project d’ina chasa da chors stà tranter ils victurs.
L’uniun «Singstadt Chur» ha uss dentant tratg enavos il project. Il motiv perquai: memia pauca plazza. L’uniun pudess nizzegiar mo duas da las trais auzadas. L’ulteriura auzada ha la citad da Cuira empermess al teater d’uffants «Zapperlot». Tar las duas auzadas che stattan a disposiziun croda dentant anc ina gronda part da la surfatscha davent. Quella vegn duvrada per exempel per construir in lift e per crear avunda pussaivladads da fugir.
Per l’uniun «Singstadt Chur» vai uss dal plan concret enavos a la visiun. In auter lieu n’ha l’uniun anc betg chattà. Pel mument sa concentrescha l’uniun er pli ferm sin dus occurrenzas ch’han lieu il proxim temp a Cuira. Ina da quellas è la concurrenza da chors svizra 2021. L’idea d’in lieu d’inscunter per chors persequitescha l’uniun dentant vinavant.
Flurin Clalüna
