La promoziun da la generaziun giuvna: in'investiziun en l'avegnir

L'Uniun svizra dals chors (USC) promova la generaziun giuvna cunzunt cun fundar chors da giuvenils chantunals, cun promover labels da qualitad per il chant da scola e cun intensivar la scolaziun da dirigents.

Las activitads sin il sectur da la generaziun giuvna èn chaussa da l'Uniun svizra per la promoziun da chors d'uffants e da giuvenils (SKJF) ch'è commembra da l'USC.

Ils suandants accents e projects èn planisads:

Fundar chors da giuvenils chantunals

Cun fundar chors chantunals e regiunals vul ins promover il plaschair da chantar dals uffants e dals giuvenils. L'USC metta gugent a disposiziun sia gronda experientscha per l'organisaziun e la realisaziun da champs da chant.

Konzept der SCV zur Gründung Kantonaler Jugendchöre

Crear labels da qualitad per il chant da scola

Per promover il chant en scolina ed en scola duain vegnir introducidas distincziuns per il chant da buna qualitad. Sco exempel serva il chantun Vallais cun il label «Kolibri».

Scolar dirigentas e dirigents

La scolaziun ed il perfecziunament da dirigentas e da dirigents da chors d'uffants e da giuvenils vegn intensivada. Tranter auter realisescha l'USC en collavuraziun cun la scola da musica da Zug la scolaziun «Dirigent cun diplom CH I».

 

Seminari per dirigentas e dirigents da chors d'uffants e da giuvenils.

La rait da las dirigentas e dals dirigents

Mintg'onn vegn organisà in inscunter naziunal per las dirigentas ed ils dirigents chantunals che serva a la tgira dal contact ed al perfecziunament. Plinavant ha lieu mintg'onn ina dieta cun las persunas responsablas per la promoziun da la generaziun giuvna e las dirigentas ed ils dirigents.

Il sustegn da chors da giuvenils e d'occurrenzas

L'USC è ina da las organisaziuns purtadras dal Chor svizzer da giuvenils. Plinavant pussibilitescha ella a chantaduras ed a chantadurs talentads da participar a projects da chors internaziunals. Er occurrenzas sco il Festival svizzer per chors d'uffants e da giuvenils, il Festival europeic per chors da giuvenils a Basilea u emnas da chant vegnan sustegnidas.