Novitads

Vad 11.07.2024

<< enavos

«Stritg d’uniun cun la giuventetgna»

Quai era il cuntegn da quest Giron – e quai betg senza motiv. Las festivitads avevan numnadamain cumenzà ils 24 da matg cun in concert be per uffants. Quatter chors d’uffants cun totalmain 140 chantadur*as han conquistà ils cors da numerusas persunas ord il public. Mintga chors pudeva preschentar ina part da ses agen repertori ed a la fin han tut ils uffants chantà communablamain. Il proxim di era deditgà als chors da creschids avant giuria. 330 chantaduras e chantadurs ord quatter chors virils e set chors maschadads èn sa preschentads in suenter l’auter avant in public da var 200 persunas. Intgins vitgs han resalvas sch’i va per organisar uschè festas, surtut resalvas finanzialas. Il president dal comité d’organisaziun, Christian Jaccoud, quieta dentant: Il resultat final per quest Giron è fitg positiv, Ils chorists han pudì profitar da l’infrastructura ideala da Goumoëns-la-Ville: Ina sala cun buna acustica e locals da prova, be paucs pass davent dal lieu da concert.

 

Repertori

Ils Girons en il Vad preschentan al public surtut chansons armonisadas. Vad è in dals ultims chantuns che sa tegna anc vid quest repertori. L’auditori ha dentant pudì giudair tocs da chors populars (Volery, Kaelin, Tille, Girod...), quatter tocs classics, in negro spiritual ed autra musica da tut il mund.

Tut quai ha gì lieu en ina bellischma atmosfera, adina cun ina moderaziun adattada da Jean-Luc-Bezençon. Sco punct culminant èn sco emprim vegnids ensemen tut ils chors maschadads, ed a la fin anc ils chors virils. Uschia hai dà ina enorma paraid da chors. Ensemen han els chantà «Hymne des vendanges» da Jérôme Berney e «Petit jardin plein d'ombre» da Gustave Doret, suandà da «Nous allons chercher le vent», arranschà da Dominique Gesseney-Rappo, ed «Amor vittorioso» da Giovanni Gastoldi. Sco ch’ins enconuscha dals carnets dad Asterix hai a la fin anc dà in banchet communabel – dentant senza ch’in bard è vegnì sclaud!