Novitads
<< enavos
Ina tura atras ils Ateliers da fufragnadi al FSC 22
Chant gregorian
Mi’emprima fermada è tar Pader Daniel Emmenegger. El maina la « Schola », la gruppa per chant gregorian a la Claustra Einsiedeln. Nus, ina gruppa dad interessads, survegnin in fegl da notas cun notas quadraticas e segns curius, uschenumnadas «Neumen», che mussan la melodia. Nus empruvain da chantar unisono – ina chaussa difficila a reguard il text latin ed ils blers ornaments musicals, las uschenumnadas Melismas. Tuttina badain nus spert, che questa musica modesta ha ina fascinaziun tut speziala.
Plain entusiassem declera Pader Daniel davart sias emprimas scuntradas cun il choral gregorian. Sia moda e maniera simpla haja al cumenzament irrità el. Cun il temp s’haja dentant avert in entir univers. Il chant gregorian è sa sviluppà en ils 8 e 9avel tschientaner s. C.. El saja il resultat da scuntradas tranter l’Europa centrala e l’Europa dal sid, declera il pader. Carl il Grond vuleva unifitgar il chant en baselgia ed ha tramess muntgs en il nord per declerar ad els sco ch’il « dretg » chant funcziuna. Tar quels inscunters haja er dà conflicts, cun quai ch’als muntgs na plascheva l’autra varianta da chantar insumma betg. Il resultat da quels conflicts èn ina bellezza, che commuventa anc adina. Durant il ateliers porscha quest chant modest bunamain schon in mument contemplativ en ils turbels da festival.
Circle Singing
Sco proxim emprov jau il « Circle Singing ». Quai n’è dentant betg simplamain chantar en in rudè, sco ch’il num di. Tar il Circle Singing ston ins improvisar. L’acrobat da vusch «Martin O.», ch’ha er gia durant l’occurrenza d’avertura dal festival fatg plaschair al public, ans bitta quasi en l’aua fraida. Nus ans posiziunain en pitschnas gruppas en in rudè, enturn nus èn autras participantas e participants che taidlan. Sco med d’agir survegnin nus ina fascha dals egls. Ella duai gidar da gizzar il sensori acustic.
Martin O. cumenza cun in curt Pattern, lura chanta ina suenter l’auter insatge nov vitiers. Pass per pass sa sviluppa uschia ina musica speziala, ch’è naschida or dal mument. Ina sfida, surtut sch’ins è sa disà da chantar adina cun notas. Suenter in temp cumenzain nus da far referenzas davart ils musters dals auters. Igl è impressiunant, tge miniaturas nunusitadas ch’ins chatta en quellas sequenzas curtas : Dal sun meditativ e plaun fin al sbratg è tut pussibel. Il punct culminant è in grond Circle Song cun tut las chantadur :as. In’experientscha musicala rinfrestganta.
Jodlar
Nus sesain plain mirveglia sin las sutgas e spetgain, che Nadja Räss ans beneventa al atelier da jodlar. E quai fa ella er – a moda impressiunanta! Sia vusch clera e ferma tuna en in givel natiral, che fa immediat pel-giaglina. L’entschatta è gartegiada: Uschè insatge vulessan ins savair far! Che mintgina e mintgin sappia emprender da jodlar, ans garantescha ella gist al cumenzament. Cun quai èn las mirveglias definitivamain qua. Sco emprim datti in stgaudar en, suenter jodlain nus. Jodlar saja, uschia Nadja Räss, in training per tut il corp.
Cun blastemmar scuvrin nus la vusch dal pèz, chantain fins tuns per chattar la vusch da chau, lura emprendain nus da midar spert tranter las vuschs – quai che vegn numnà in pau brutal sco ”culp dal nuf da la gula” (Kehlkofpschlag). Tranter ils exercizis ans declera la chantadura cun scolaziun classica adina puspè la teoria davart la vusch. Suenter chantain nus ensemen in jodel : Ina part da las chantaduras e chantadurs chanta l’accumpagnament cun simpels accords, ina gruppa creescha la melodia da jodlar. Las armonias flueschan tras tut il corp, in sentiment intensiv ! Cun grond plaschair d’avair chattà nossas novas vuschs da jodlar, bandunain nus a la fin dal curs il local.
Pater Daniel Emmenegger
Circle Singing mit Martin O.
Nadja Räss
Isabelle Schmied (Traducziun : Flurin Clalüna)
