Novitads
<< enavos
Preludi per il Festival svizzer da chant: In concert quadriling per radio e televisiun
Quatter chors ha la SRG envidà ad in concert – quatter chors, che represchentan las quatter regiuns linguisticas. Da la partida era l’ensemble «Consonus» (Grischun), il «Choeur des Armaillis de la Gruyères» (Friburg), il «Coro Calicantus Locarno» ed il Chor da giuvenils Grischun. Plinavant sunavan la gruppa Appenzellaisa «Altfrentsch» e la pianista Marion Sutter (Sviz).
Il concert ha gì lieu en la tenda da circus en il center da l’areal da festa – ina ambient nunusità per chors. Surtut l’acustica speziala era ina sfida. Sch’ins chantava da bass sin il palc, n’udivan ins betg il vischin. Plinavant era fitg chaud en la tenda da circus. Il sulegl ardeva gia tut il di giu dal tschiel e stgaudava la tenda. Er ils reflecturs procuravan per chalur. Il soundcheck, ch’ha gì lieu il suentermezdi, aveva pia parallelas cun ina visita en la sauna. Tegnair l’intunaziun era fitg difficil. Ils blers microfons e las trais cameras gievan bunamain en emblidanza.
Ma nua ch’i dat problems, datti er soluziuns. Cun ils microfons han ins rinforzà il sun ed in ventilatur da bunamain dus meters autezza purtava aria frestga en la tenda. Il tecnichers rutinads e lucs derasavan bun umur e las manadras e manaders da producziun cumpetenta han fatg lur meglier per che mintgina e mintgin sa, nua ch’el sto star.
L’emissiun cumenza
18:00 uras, en la tenda era entant in pau pli fraid, bunamain la mesadad da las plazzas da public eran occupadas, l’emissiun cumenza. Sco emprim han ils quatter chors chantà ensemen il canon “Komm und sing” – la chanzun da festival uffiziala. Il canon da quatter linguas descriva precis quai, che duai schabegiar ils proxims dis da festival: „Vegnì e chantai cun nus en il chor – nus chantain tuts da cor!”, uschia ina part dal text. Il cumponist da la chanzun, Guido Helbling, ha gest sez accumpagnà vid il clavazin.
Curant ch’ils chors èn ids en posiziun, avevan las moderaturas ed il moderatur dals emetturs SRF, RSI e RTR beneventà il public sin tut las linguas uffizialas. Finalmain saja il temp da far provas en l’atgna stanza ubain via zoom passà. Finalmain vegnian tut ils chors puspè ina giada ensemen per chantar, uschia l’introducziun da la moderatura Christine Gertschen (SRF Musikwelle).
Suenter las introducziuns cumenza il chant. Ils quatter chors, la gruppa da l’Appenzell e la pianista Marion Sutter han en roda preschentà lur savair. La variaziun era gronda: da chanzuns da patria melodicas, sur cumposiziuns modernas cun body percussion fin ad arranschaments da chanzuns da rock. Er per classichers sco «Signore delle Cime», «Weischus dü?» ubain «La chanson des étoiles» hai gì plazza en il program. Tranter las represchentaziuns han las moderaturas ed il moderatur adina puspè fatg intervistas cun chantaduras, dirigents u musicistas u musicists en tut las linguas naziunalas.
Il punct final da l’emissiun era l’imni da festival «Cantare nos liberat» da Philipp Claßen. In accord da F-Dur fulminant ha serrà giu l’emissiun – seguì d’in grond applaus dal public.
Link a la registraziun:
https://www.rtr.ch/play/tv/rtr-musica/video/gossau-2022-emissiun-naziunala-la-svizra-chanta?urn=urn:rtr:video:9a026322-c2f0-435a-a0a3-6a0520da3983
Flurin Clalüna
