Novitads
<< enavos
Intervista cun Hildegard Berli-Kälin, la nova presidenta da l’Uniun chantunala da chant da Sviz.
En il «Einsiedler Anzeiger» stat scrit, che ti has schon fatg in’impressiunanta carriera da chors. Ti chantas dapi 32 onns en il Chor da dunnas Einsiedeln! Tge muntada ha per tai il chant en in chor?
Chantar è per mai in hobby cumplessiv che pretenda e promova corp, spiert ed olma. A mai gida il chantar da serrar giu e da tancar energia.
Avant che ti es vegnida presidenta eras ti schon 9 onns vicepresidenta. È il nov post ina gronda midada u èsi plitost ina midada ruassaivla?
Jau na sai betg dir bler davart quai, jau sun pir var in mais en uffizi (ria)! Cun esser vicepresidenta hai jau dentant survegnì ina fitg buna invista en la lavur da mes antecessur Fabian Bucher. Sco substituta hai jau er schon manà ina radunanza. Per mai èsi cler, tge che vegn a spetgar.
Tge eran tias emprimas incumbensas?
Durant l’emprim mais èn gia girà in pèr chaussas. In’ulteriura festa da musica vegn giavischà, cun quai che la festa planisada il 2020 era vegnida stritgada. Uss avain nus ponderà dad organisar ina ad Einsiedeln. La votaziun consultativa tar ils chors da l’Uniun chantunala ha mussà unanimamain, ch’ina festa il 2025 è giavischada. Tut il rest sa mussa lura pir proximamain.
Co es ti ta sentì, cura che ti has vesì il resultat dad elecziun?
Jau hai sentì la confidenza da la radunanza envers mai e jau hai simplamain gì grond plaschair! Jau hai ponderà bunamain in onn davart mia candidatura. Per mai èsi cler, che sche jau vi anc cumenzar insatge, lura vuless jau m’engaschar per il chant da cumpagnia,
Cun tia elecziun vegn scrit istorgia en l’Uniun chantunala da chant da Sviz. Ti es l’emprima dunna ch’è presidenta da l’uniun. Daco han ins gest uss elegì ina dunna?
Quai è simplamain casualitad, dentant ina bella casualitad. En noss chantun festegiain nus quest onn 50 onns dretg da votar per dunnas; il chantun Sviz ha survegnì il dretg da votar da dunnas pir il 1972.
Co vesas ti persunalmain il tema promoziun da dunnas en las suprastanzas d’uniuns? È quai in tema nua che ti vuls t’engaschar durant esser presidenta?
Jau na ma ves betg sco missiunara, dentant pli sco exempel per motivar autras dunnas da far part da la suprastanza. Natiralmain fissi bel, sche dapli dunnas fissan en las suprastanzas. Ins po bain esser in pau curaschusa ed avair confidenza! Jau di adina: Tge è il pli nausch che sa schabegiar? Atgnamain be, ch’ins bada che quella lavur n’è betg la lavur dretga insatgi. Ins po dentant emprender ina massa en suprastanza.
In sguard en il passà: Tge ha muventà tai da far il pass en la suprastanza dal SKCV?
I dovra adina in pèr persunas che «tiran il char» e ch’èn prontas da far dapli. Grazia a quella lavur pon autras persunas profitar e metter sez en pe insatge. Da là vegn mes plaschair, ch’è er la paja per l’engaschament.
Tge vuls ti cuntanscher sco presidenta dal SKCV? Tge èn tias proximas finamiras?
La proxima finamira vegn l’emna che vegn: Tut ils chors che sa participeschan al FSC 22 han la schanza dar in concert avant dus experts e davant public – quasi sco prova principala per il festival. Dirigentas e dirigents survegnan lura in resun ed in pèr tips per meglieraments. Nus nizzegiain quella schanza per giudair puspè ina giada la vita d’uniun. E sche la Festa da musica vess da gartegiar, ans occupa quella per ils proxims trais onns. In’ulteriura finamira è, ch’ils chors survegnan puspè stabilitad e confidenza suenter il temp da corona. Là vulain nus gidar. Plinavant vi jau promover il chant communabel sco lieu da sentupada.
Tge manegias ti concret?
Forsa cun organisar in di dal chant – senza expertas ed experts, dentant mo cun inscunters e be per il plaschair! Cun il chant ed entras mes engaschament en il Chor da dunnas Einsiedeln èn sa sviluppadas bleras amicizias. E cun quai che nus organisain adina puspè projects surregiunals, hai jau emprendì ad enconuscher blera glieud interessanta.
Tge èn tes giavischs da l’USC?
Natiralmain sun jau spanegiada sin il nov president central u la nova presidenta centrala. Per mai èsi impurtant, ch’el u ella – sco il president actual Claude-André Mani – ha il fieu per ils chors. Mo engaschar in manager, che n’ha betg idea dal chantar – e cun quai na manegel jau betg teoria da musica – na fiss betg ideal.
En temps da corona han bleras uniuns pers commembras e commembers. Co pon ins puspè motivar la glieud da chantar?
Ins sto mussar e dar vinavant il plaschair da chantar! Nus avain actualmain in chor da dunnas, ch’ha mo pli indesch commembras. Tuttina vulan ellas organisar in project, e quai sustegn jau plainamain. Sch’ellas pon mussar al public il plaschair vid chantar, survegnan ellas segir er novas commembras.
Noss chor organisescha adina puspè projects, nua ch’era chantaduras che na sa vulan betg liar pon sa participar. Mintga giada restan in pèr vinavant en il chor.
Plinavant èsi impurtant da schlargiar l’orizont e d’empruvar insatge nov. Sch’in chor viril per exempel vul carmalar novs commembers, na va quai probablamain betg cun la chanzun «Von der Traube in die Tonne». Er sche quella chanzun è bella: Ins sto empruvar insatge nov. In bun exempel per quai è il «männerxang küssnacht» sut la direcziun da Jonathan Prelicz (Dirigent da l’uniun dal SKCV). Il chor ha in nov num, in nov outfit e tgira in nov repertori. Uschia ha el survegnì novs commembers.
Dapi corona è voss’uniun chantunala creschida per dus chors. Tge eran ils motivs per quai?
Jau n’enconusch betg ils motivs exacts. Jau pens dentant, ch’ils dus chors vulevan sa segirar e survegnir structuras stabilas. Sco commember da l’uniun chantunala datti intgins avantatgs. Uschia datti per exempel ina segirada d’accidents, ins survegn adina las pli novas infurmaziuns davart mesiras da corona, las taxas da la SUISA vegnan cuvridas, i dat in scleriment giuridic ed i dat la schanza da sa barattar or e da furmar ina rait da contacts.
Tge è atgnamain tes proxim Highlight, sin tge t’allegras ti?
Natiralmain sin il Festival svizzer da chant a Gossau! Jau sun da la partida sco chantadura cun il Chor da dunnas Einsiedeln e sco giast d’onur.
Hildegard Berli-Kälin è naschida l’onn 1965, era 15 onns en la suprastanza ed otg onns presidenta dal Chor da dunnas Einsiedeln. Là chanta ella anc adina. Suenter nov onns sco vicepresidenta dal SKCV è ella vegnida elegida sco presidenta. Ella è tgirunza diplomada, porscha terapia da las zonas da reflex dal pe ed ha quatter uffants creschids.
Suprastanza d’enfin ussa cun persunas d’onur:
d. san.
Bruno Jakob, cassier
Jonathan Prelicz, dirigent chantunal
Sigi Jäger, actuar d’enfin ussa – da nov commember d’onur SKCV
Kaspar Knobel, bandierel chantunal
Fabian Bucher, president chantunal d’enfin ussa – da nov president d’onur SKCV
Hildegard Berli-Kälin, vicepresidenta d’enfin ussa, da nov presidenta chantunala SKCV
Franziska Herzog Wolf, assessura d’enfin ussa, da nov actuara
Nova suprastanza a partir dals 12 da mars 2022:
Jonathan Prelicz, dirigent chantunal
Franziska Herzog Wolf, actuara
Kaspar Knobel, bandierel chantunal
Hildegard Berli-Kälin, presidenta chantunala SKCV
Bruno Jakob, cassier
Hildegard Berli-Kälins «Chorheimat»
Chor da dunnas Einsiedeln
Il 2019 – festivà il 60avel onn da giubileum ….. cun program: «one moment in time»…
sut:
www.frauenchor.ch
Isabelle Schmied (Traducziun : Flurin Clalüna)
