Novitads
<< enavos
Fin d’emna 2021 per commembers e commembras da l’ECA (European Choral Association)
Igl n’è nagina casualitad, che la suprastanza ha elegì la citad da Lyon per la radunanza da commembras e commembers. La citad principala da la gastronomia franzosa ha er in bun renum per sia scena musicala. L’orchester e l’opera èn da renum internaziunal, dentant datti er chors da tut las vegliadetgnas e stils. Ditg curt: il lieu ideal per cumbinar lavur administrativa e concerts.
Ils 19 e 20 da november èn sa scuntradas represchentant*as da las pli impurtantas uniuns da chors dals pajais Norvegia, Serbia, Italia, Russia, Spagna, Frantscha, Svezia, Luxemburg, Irlanda, Belgia, Tirchia, Bieloruss, Finlanda, Lettonia, Ungaria, Germania, Austria, Estonia, Pajais Bass e da la Svizra. Tranter els èn stads divers «veterans», che vegnan adina puspè gugent ensemen per discutar davart las experientschas, sfidas e success en lur pajais. Dentant er ina retscha da represchentant*as novas, tranter els blera glieud giuvna, èn stads da la partida. Quai mussa, che la musica da chors n’è betg ord la moda!
Temas actuals
La suprastanza da l’ECA è entamez il temp preschent. Quai vesan ins vid ils temas ch’han fat part da la discussiun, uschia per exempel ils fastiz ecologics, egualisaziun tranter ils differents genders e l’integraziun da minoritads. Suenter ils referats intensivs hai dà in concert d’aperitiv. Il ensemble vocal Cassiopée sut la batgetta da Laurence Faricier – in ensemble che consista dad amaturs, student*as e persunas giuvnas tranter 18 e 35 onns – ha persvas cun in repertori multifar, cun l’engaschament da chantadur*as e cun il plaschair vid la musica.
La Cigale de Lyon, in chor da giuvenils sut la direcziun da Anne-Marie Cabut, ha persvas cun la purezza da las vuschs e cun in ina sonoritad remartgabla. Il repertori, ch’era dal tuttafatg deditgada a musica classica contemporana, è vegnì ornà cun choreografias adattadas. Il public dal fatg era intgantà.
Cassiopée
La Cigale de Lyon
Radunanza generala
Sper ils temas, che tutgan tar mintga radunanza generala, ha la radunanza generala da l’ECA dà in sguard enavos sin numerusas activitads. Tranter quellas tutga il festival, ch’ha gì lieu questa stad a Ljublijana. Il mument spetgà il pli vess era l’elecziun da la nova suprastanza. Mintga candidata e mintga candidat, er las persunas ch’eran fin qua en uffizi, han stuì preschentar durant duas minutas lur motivaziun per la candidatura. Ellas ed els avevan schon ordavant tramess lur dossier e lur video a tut ils commembers e commembras. Fertant che las persunas ch’eran fin qua en uffizi èn vegnidas reelegidas, schizunt perquai ch’ellas eran enconuschent a la radunanza generala, han novas candidat*as gì da cumbatter pli ferm. Per la candidatura svizra, David Rossel, n’hai betg tanschì. El ha survegnì memia paucas vuschs. Cun quai n’è la Svizra quest onn betg en l’ECA. Proxima giada lura puspè!
David Rossel
Concert da gala
En la sala d’Edgar-Varèse dal «Conservatoire National Supérieur de Musique et de Danse» a Lyon hai dà il highlight musical per participantas e participants dal congress. Sut la batgetta da Tanguy Bouvet e Pascal Adoumbou (che dirigia dal rest il chor OneStep Gospel da Losanna) han chantadur*as dal «Jeune Chœur Symphonique – Spirito» preschentà ovras da Karin Rehnqvist, Luigi Dallapiccola e Ross Lee Finley. Tranter las ovras fitg pretensiusas, hai dà chanzuns bellischmas da Francis Poulenc. Er sch’ils giuvens musicist*as da professiun han chantà senza ina macla tecnica: In pau dapli libertad da la partitura avessan ins giavischà. Dentant n’hai durant la perioda da Covid er betg dà bleras occasiuns da far provas.
Lionel Sow, professur per diriger al conservatori a Lyon, ha mess a ses student*as vis a vi al «Chœur Atelier des CNSMD Lyonnais». Dudesch chantadur*as professiunalas d’aut nivel, ch’han mintgamai dirigì ina part ord in da dus tocs ord il 20avel tschientaner: «Cinq Rechants» dad Olivier Messiaen e da Jean-Yves Daniel-Lesur l’ovra «Cantique des cantiques». Tgi che sa diriger quellas ovras fitg cumplexas, sa diriger tut. Las student*as, mintgin e mintgina cun agen stil da diriger, han dumagnà l’incumbensa cun bravura! Quest grond mument è vegnì turblà, cun quai ch’ina da las chantaduras è crudada en svaniment ed è restada per diesch minutas immobila sin il fund. Per fortuna n’ha ella betg gì blessuras pli nauschas.
Ils commembers da l’ECA èn turnads cun tut lur emoziuns enavos en lur hotels. Els han dentant anc prendì l’occasiun da mirar ina davosa giada la citad dals «Canuts» (tessunz da saida da Lyon), avant ch’els èn turnads en lur pajais d’origin.
Thierry Dagon (trad. Flurin Clalüna)
