Novitads
<< enavos
Da Nadal notg
Sin mintga registraziun dal Chor svizzer da Giuvenils (CSG) spetgan ins cun brama. Ed er la nova CD da l’ensemble accumplescha tut las pretensiuns. En il program, che consista mo ord musica da Nadal, fascinescha la gruppa sut la batgetta da Nicolas Fink atras il grond engaschament da mintga chantadur*a. Il resultat persvasa: tun sonor, dinamica viva ed in bun equiliber tranter ils differents registers.
Chanzuns populars, sco «Dormi, dormi, bel bambin» u «De Schtärn vo Bethlehem», ina ovra dal cumponist Paul Burkhard en in arranschament da Alban Müller, vegnan preschentadas a moda frestga e simpla. Ina scuverta è il toc «Noël nouvelet». Questa chanzun enconuschenta ord il 15avel tschientaner è vegnida arranschada da Valentin Villard. Sia elavuraziun merita in grond laud: scrit a moda bellischma, cun fantasia, subtil e plain emoziuns. Er la pronunzia dal Franzos vegl persvada. Gronda impressiun fa er il toc «Deus tu convertens» da Rheinberger. Surtut la gronda paletta da nianzas vocalas e sonoras fan impressiun.
Cun bel legato e dinamica ritmica mussa il CSG, ch’el na sa sto betg zuppentar da musica veglia. Dus exempels per quai èn las ovras «Hodie Christus natus est» da Serafino Cantones ed en «O regem coeli» da Victoria. Il «Alma redemptoris Mater» da Gonzague Monney transferescha l’auditur*a en tempra da Nadal, surtut pervia da sias armonias chaudas. Las dus cumposiziuns dal Grischun Gion Antoni Derungs ans prendan sin in viadi atras cuntradas d’enviern nocturnas. Il medem vaglia per la chanzun da Nadal da Caroline Charrière, u il «O natal Lux» da Carl Rütti, sco er il «O magnum mysterium» da Cyrill Schürch. Poesia pura, cun bler finezza.
Tranter las bleras «carols», englais per chanzun da Nadal, è «The Twelve Days of Christmas» probablamain la pli enconuschenta. La versiun da Ludwig Böhme preschenta quella chanzun veglia sco versiun da jazz. Plain ritmica difficila e cun tempra frestga pretenda ella bler da las chantadur*as. Il chor dumogna l’incumbensa pretensiusa dentant cun bravura, malgrà intgins tuns fitg auts e gizs. Er tar l’interpretaziun bella da «Hora est» da Mendelssohn na datti da principi nagut da crititgar. Surtut l’entschatta, nua che mo ils umens chantan, fiss in tun da chor pli «plain» dentant stà giavischabel.
La registraziun finescha cun l’enconuschent «Carol of the Bells» da Leontovych, en in arranschament da Gardo Hamilton. Il toc è in exempel perfect per in arranschament d’auta qualitad, nua ch’il Chor svizzer da Giuvenils superescha tut las difficultads cun ina levezza e musicalitad remartgabla.
Dapli infurmaziuns:
www.csj-sjc.ch
Thierry Dagon (trad. Flurin Clalüna)
