Novitads

Associaziun 10.09.2021

<< enavos

Nova seria «Lavur d’uniun gartegiada»: #1 Engaschi voluntari en l’uniun da chant

Chara Rahel Butzerin-Simmen,  pertge has ti cumenzà da lavurar per l’Uniun chantunala da chors da l’Appenzell (ACHV)?  

Sco chantadura en il chor «stimmmix», che fa part da l’Uniun chantunala da chant da l’Appenzell, han ins dumandà a mai dad ir en la suprastanza. Tut ils commembers, cun excepziun da la cumissiun da musica, èn numnadamain sa retratgs da la suprastanza. Jau fascheva schon part en las suprastanzas da dus chors, perquai era jau er averta per in emprim inscunter. Pir là èsi dentant vegnì cler ch’i va per il futur da l’uniun. Sch’ins n’avess chatta nagina suprastanza na fissi betg stà cler sch’i dat er vinavant in ACHV.

E co es ti daventada presidenta?

Tar l’inscunter eran nus trais persunas interessadas. Las dus autras han schon dà lur consentiment dad entrar en la suprastanza, dentant cun la cundiziun da betg stuair surpigliar il presidi. Jau sun stada fitg surpraisa da quella situaziun. Jau hai lura prendì intgins dis per far patratgs e jau hai er discurrì cun dus persunas ord la MuKo, Lukas Bolt (actualmain commember da la cumissiun da musica da l’USC e dal ACHV) e Kathrin Pfändler-Kehl (anteriura dirigenta chantunala dal ACHV). A la fin vuleva jau ristgar in’emprova e hai ma mess a disposiziun per il presidi.

Co era l’entschatta?

Suenter l’elecziun ed ina curta instrucziun da mes antecessur, hai jau stuì per emprender las structuras actualas, emprender ad enconuscher collegas da suprastanza e lura studegiar co ch’i va vinavant cun l’Uniun. En l’emprima lingia vulevan nus restar tar quai che s’è cumprovà e mirar co ch’i va vinavant. Plinavant avevan nus preschentà la nova suprastanza als chors. Surtut jau, sco Grischuna, era pauc enconuschenta en l’ACHV. Jau hai dentant sentì gronda engraziaivladad da tut las varts.

Dovri intginas premissas per la lavur en e per l’uniun?

Il pli impurtant è il plaschair e la motivaziun da cuntanscher insatge en il mund da chors. Cun in pau curaschi creschan ins spert vid las incumbensas. La repartiziun da resort sa dat cun las abilitads che mintga persuna ha. Il potenzial perquai han da principi tuts.

Quant temp dovras per tes uffizi?

Mintga mais èn quai var trais fin quatter dis da lavur. Quel temp pos jau repartir sco che jau vul, uschia ch’i va bain sper lavurar a temp cumplain. Plinavant dependa ferm da las atgnas pretensiuns a l’uffizi. Cun quai che jau ma met cun grond engaschi vid la lavur per l’uniun, emblid jau mintgatant il temp.

Tge midassas ti, sche ti pudessas midar insatge?

I fiss flot, sche bler dapli persunas giuvnas s’engaschassan en las suprastanzas da las uniuns chantunalas u perfin en l’uniun tetgala. Persunas giuvnas ed engaschadas portan ideas creativas, pussibiliteschan in mix da vegliadetgna interessant en las suprastanzas e gidan da represchentar tut las vegliadetgnas en ils chors.

Tge agid porscha l’ACHV las suprastanzas dals chors?

Cun sa barattar or cun president*as da noss chors avain nus vis, che purschidas per commembers da suprastanza fissan bainvesidas. Perquai avain nus fatg avant dus onns in curs davart il tema «Co fa la lavur en la suprastanza plaschair». Quest onn datti in ulteriur curs davart il tema «Sponsoring en las uniuns». L’interess per ils dus curs è stà grond ed igl ha dà bleras annunzias e resuns.

Tge gudognan ins cun s’engaschar per l’Uniun? Co fessas ti recloma tar voluntaris?

Sper la gronda rait da contacts ch’ins sa bajegia si, emprendan ins er per exempel co ch’ins lavura a moda structurada, co ch’ins sa preschenta, co ch’ins maina ina sesida. Quai èn abilitads ch’ins sa bain duvrar en la vita privata e professiunala. Igl è simplamain grondius da vesair, sco ch’ina idea survegn vita, sco ch’ella vegn realisada e co che las persunas participadas èn fieu e flomma. Quellas experientschas valan dapli ch’ina remuneraziun.

Tge ston ins resguardar, sche persunas novas cumenzan en la suprastanza?

Ina surdada dal antecessur gida da survegnir in’emprima survista dal resort. Plinavant èsi impurtant dad integrar la nova persuna en la suprastanza e mussar che las visiuns da l’uniun èn centralas. Tar persunas ch’èn l’emprima giada en ina suprastanza, duess ina persuna cun experientscha sustegnair ella e dar temp per sa viver en.

Tge has ti schon cuntanschì en l’uniun, e tge vuls anc cuntanscher?

Il pli bel che la suprastanza e la MuKo han cuntanschì, è che nus avain midà intginas chaussas en ils davos quatter onns.

Il logo attractiv e la pagina d’internet dattan ina impressiun frestga e dinamica da l’uniun. Plinavant essan nus pli visibels en la scena da chors. Intginas da nossas ideas han er autras uniuns surpiglià, quai fa grond plaschair. Plinavant essan nus uss er interessant sco partenari da collavuraziun interregiunal.

Plinavant è il contact cun ils chors daventà pli stretg. Surtut durant la crisa da corona avain nus pudì sustegnair ils chors cun infurmaziuns e cun in’ureglia averta. Quai surtut er cun l’agid impurtant da l’USC, per quel essan nus fitg engraziaivels.

La finamira è da rinforzar l’uniun da chors e da manar ella vinavant. Il 2024 festivain nus il giubileum da 200 onns, e quai vulain nus festivar.

D uschiglio: far vinavant, examinar tut ils interess, crear purschidas regiunalas e surregiunalas e motivar sche pussibel tut ils chors en ils chantuns Appenzell Ausserhoden ed Innerrhoden da far part a l’uniun da chors.

Plinavant avais vus uss in chor da giuvenils!

Precis! Suenter che nus avain udì dal chor da giuvenils, che Lea Stadelmann e Anna Kölbener han fundà, avain Lukas Bolt ed jau tschertgà il contact cun las giuvnas manadras. Uschia avain nus pudì gudagnar il chor sco «Chor da giuvenils chantunal». Nus essan fitg loschs da quai ch’ellas han cuntanschì entaifer curt temp. L’emprim project ha schon var 40 annunzias.

L’intervista è vegnida fatga in scrit.

 

Biografia musicala da Rahel Butzerin-Simmen

La giuvna presidenta da l’uniun ha schon durant il temp da scola chantà bler. Ella è commembra da fundaziun dad «incantanti», in chor da giuvenils enconuschent e cun grond success. Sco dirigenta maina ella il «ensemble encanto» e lavura sco segunda occupaziun sco musicista da musica sacrala cun diplom C. Oz chanta Rahel Butzerin-Simmen en ils chors stimmmix, consonus vokalensembel e con passione.

 

Pagina d’internet Uniun chantunala da chors da l’Appenzell:

https://www.achv.ch/

 

Links da las paginas d’internet da tut las uniuns chantunalas:

https://usc-scv.ch/index.php?pid=90&l=%20de

 

Sustegn tar la lavur en l’uniun: Il post spezialisà Vitamin B

L’uniun Vitamin B è vegnida fundada cun il Procent da cultura da la Migros. Il post spezialisà ha la finamira da sustegnair l’engaschament voluntari e las uniuns: www.vitaminb.ch

En il magazin dal fatg B-Dur Nr. 29datti intgins tips gidaivels per ina cultura da bainvegni en uniuns.

 

Rahel Butzerin-Simmen