Novitads
<< enavos
Céline Grandjean davart il potenzial ed il futur dal Chor Svizzer da Giuvenils
Céline, ti es musicista, musicologa, dirigenta, manadra da plirs chors ed uss anc presidenta dal Chor Svizzer da Giuvenils – daco questa nova sfida?
La promoziun dals chors è fitg impurtanta per mai. Las chantaduras ed ils chantadurs dal CSG èn fitg cumpetents, talentads e plain ideas. Perquai èn ellas ed els impurtants per il futur da la scena da chors svizra. Plinavant hai jau adina apprezià il barat tranter la Svizra tudestga e la Svizra latina e jau sun persvasa ch’i dat grond potenzial en projects naziunals. Jau ma legrel fitg da pudair lavurar per e cun il las giuvnas e giuvens e da prender per mauns projects interessants.
Tge vuls ti sco presidenta dal CSG per tut pretsch realisar?
Sco Romanda deploresch jau ch’il CSG n’è betg pli uschè enconuschent en la Svizra franzosa. Mia finamira è che las differentas regiuns e la diversitad culturala vegn represchentadas meglier en il chor. Saja quai en connex cun la derivanza da chantaduras e chantadurs, il repertori, ils lieus nua che nus faschain concerts u puncto dirigents ospitants. Plinavant vul jau integrar il CSG meglier en la scena da chors svizra, pia: nizzegiar dapli sinergias – sur tut cun auters chors da giuvenils. Dentant er en il exteriur duai il CSG daventar pli enconuschent.
Tge incumbensa fa la pli gronda prescha?
Sco emprim vegn uss il nov cumenzament suenter la crisa da corona. La suprastanza persequitescha conscienziusamain la situaziun e prepara schon intgins scenaris. Nus sperain che la situaziun sa meglierescha spert. Per las chantaduras ed ils chantadurs èsi bunamain d’impurtanza vitala da pudair chantar puspè! Dentant er da sviluppar vinavant ils chors, gist en temps uschè malsegirs, è ina incumbensa impurtanta. Plinavant èn planisads plirs projects da revival per quest onn, spezialmain la participaziun a las Bachwochen a Thun u la registraziun d’ina CD da Nadal.
Tge muntada ha la musica per tia vita?
La musica è mia professiun e mia pli gronda passiun. Musica è per mai ina lingua che permetta da transferir emoziuns u ideas pli facil che cun pleds. Surtut appreziesch jau il chantar ensemen. Quai creescha in spiert da cuminanza e promova il barat.
Èsi per tai schon adina stà cler, che ti vuls far la musica tar tia professiun?
Na, insumma betg. Cun sis onns hai jau cumenzà da sunar clavazin e dapi che jau sun otg hai jau cumenzà da chantar en in chor. Cun 14 n’hai jau gì nagina veglia pli e jau vuleva chalar. Mes geniturs han dentant motivà mai da far vinavant. Atras differents eveniments musicals, tranter auter concerts, hai jau dentant badà che musica è dapli che mo in hobi. Jau hai pia studegià pedagogia da musica ed uschia hai jau er cumenzà da diriger chors.
Tge è stà tes emprim concert cun in chor?
Cun mes chor d’uffants hai jau ina giada pudì chantar il «Stabat Mater» da Pergolesi. Quai era mia emprima sentupada cun in orchester. Quell’experientscha ha gì ina grond’influenza sin mai e jau hai decidì da dir vinavant sin l’aventura chors. Questa musica ma commova anc adina.
Tge è stà tes pli grond mument da pel-giaglina cun il chor?
Cura che jau hai per l’emprima giada dirigì 900 chantaduras e chantadurs e 100 instrumentalistas ed instrumentalists durant la Fête des Vignerons. Nus avain fatg provas en in bajetg da sport e jau hai gì avant mai ina tribuna plain glieud, che chantavan u sunavan plain energia il tun final. Quai è stà magic !
Cumplettescha: In mund senza chant fiss…..
… in mund senz’olma.
Tar uschè bleras incumbensas ed incaricas en la scena da musica – fas er anc en il temp liber musica?
Sa chapescha! Jau vom schon er gugent en las muntognas u che jau legel insatge… Dentant il pli bler temp passent jau cun tadlar musica u far musica. Avant intgins mais hai jau cumenzà dad emprender Viola da Gamba, mo pervi dal plaschair.
Tge giavischas ti per il futur dal CSG?
Jau sper ch’il CSG resta vinavant in lieu nua che qualitad musicala ed amicizia sa collian.
Interview: Rahel Röthlin, translaiziun: Flurin Clalüna
