Novitads
<< enavos
Concurrenza da cumponer dal Festival da la chanzun rumantscha 2022
Noss chors dovran chanzuns novas!
Ils chors svizzers e grischuns pon far diever d’ina gronda schelta da chanzuns enconuschentas ch’ins auda gugent. Els han però er basegn da chanzuns per renovar lur repertori. Ina iniziativa cun quel scopo vegn da la «Uniun la chanzun rumantscha» cun ses festival e cun la concurrenza da cumposiziuns. Quel è dal 1. als 3 da fanadur 2022 a Zuoz. En il center è il chant rumantsch, en spezial la concurrenza da cumposiziuns. Quella ha la finamira da animar a cumponistas e cumponists da stgaffir novas ovras per mantegnair la cultura da chant en las regiuns e valladas da noss chantun.
La concurrenza da cumposiziuns: tramettai vossas ovras!
Quellas vegnan valitadas d’ina giuria e preschentadas durant il festival. La decisiun è lura tar il public che tscherna sias chanzuns favuritas da mintga categoria. Las cumposiziuns pon vegnir inoltradas fin ils 21 da zercladur 2021 (data dal bul postal) al coordinatur da la giuria Giusep Giuanin Decurtins:
Festival da la chanzun rumantscha
Giusep G. Decurtins
Via Canal 22
7153 Falera
Ils detagls davart il proceder ed ulteriuras infurmaziuns chattais sin la pagina chanzunrumantscha.ch.
Intervista cun Gion Andrea Casanova che ha survegnì il 2019 per sia cumposiziun «Aurora» il terz premi ed il premi dal public
Tge ha animà vus da participar il 2019 a la concurrenza da cumposiziuns dal Festival da la chanzun rumantscha?
Jau sun vegnì en contact cun quest festival da chant entras Clau Scherrer. El ha animà mai da prender part a quest eveniment en furma cumpositorica. Plinavant è la motivaziun creschida cul patratg da savair contribuir uschia ina pitschna part a la realisaziun da questa festa culturala.
Vossa chanzun porta il titel «Aurora», tenor in text da Arnold Spescha. Tge ha plaschì vi da quella poesia?
En general commuventan mai las poesias da Arnold Spescha grondamain. Bleras en tschentadas curt, resunan dentant lung en l'olma da quel che legia ellas. «Aurora» è ina da quellas poesias. L'intensitad el pled e la furma libra envidan a siemiar en tuns.
Co avais vus chatta l’inspiraziun per la melodia?
La naschida dil di è in act intim da la natira. Quella intimitad è seraina e fragila. Ord quella imaginaziun è la melodia naschida discus.
Las chanzuns da la concurrenza da cumposiziun duain er vegnir chantadas da cors laics Co avais vus emprova da resguardar quai?
«Aurora» sa preschenta en in vestgì cumplettamain tonal e levgescha uschia al chantadur igl access musical. Ultra da quai datti entaifer la chanzun naginas midadas da tact, la ritmica da la melodia suonda en furma organica quella da la poesia, las vuschs as movan ruassaivel ed unitar. La sonoritad predominescha, la virtuositad tschessa.
Cur che la chanzun è vegnida chantada l’emprima giada, essas vus stads satisfatgs?
Jau hai giu grond plaschair da l'interpretaziun e sun anc oz engraziaivels al chor e dirigent per lur grond engaschi en favur da nossa verva, nossa cultura da chant.
Avais vus survegnì reacziuns dal autur Arnold Spescha e da cors che han prendì «Aurora» en lur repertori?
Arnold ed jau essan curt s’embratschai al di dil festival, el è ina grondiusa persunalitad. Igl ha da intginas reacziuns bainvulentas ed intgins chors han era gia chanta «Aurora», tranter auter il chor da giuventetgna grischun.
Pudais vus recumandar ad autras cumponistas e cumponists da far questa experientscha e da participar a la concurrenza da cumposiziuns?
Jau sun sta intgantà da quest festival. Nus Rumantschs essan pelvaira in pievel da chant. E perquai dovra novas chanzuns rumantschas. Ina concurrenza da cumposiziun è ina buna plattafurma per novas creaziuns. Quai sa dar novs impuls als cumponists indigens, mo era giavinar cumponists d’ordaifer da sa participar a la concurrenza. Gugent avess jau era udì las chanzuns che na èn betg vegnidas undradas. Quai è tschella vart da la medaglia d'ina concurrenza, il cumponist va en la ristga, che ses toc vegn betg resguarda. Quai sto el savair avant ch'el tschenta ses emprim tun sin palpiri.
https://www.youtube.com/watch?v=caMRYeadhBw
Gion Andrea Casanova ha 48 onns, è creschì si a Laax en ina famiglia zunt musicala. El ha fatg divers studis da musica, uschia a la scola auta a Lucerna e là ha el er fatg ses diplom da concert sco fagottist. El ha er absolvì curs da maister a Vienna, è commember da la filarmonia da chombra dal Grischun e magister da musica tar diversas scolas. Sper quai è el er chantadur tar ils Furbaz.
Gion Andrea Casanova è da chasa en blers geners da musica, da la classica fin tar la musica da divertiment ed er sco cumponist autodidact ha el in spectrum zunt vast.
www.chanzunrumantscha.ch
www.facebook.com/groups/806745036737318
Per dumondas generalas areguard il Festival da la chanzun rumantscha, p.pl contactar Curdin Lansel, president dal comité d’organisaziun FCR 2022.
079-833 82 15.
Per dumondas areguard il proceder da la concurrenza da cumposiziuns, p.pl contactar Giusep Guanin Decurtins, administradur da la giuria. decurtins.falera@bluewin.ch
Fortunat Froelich, Foto: Yannik Andreia
Gian Andreas Casanova
Jachen Prevost
