Novitads
<< enavos
Festival svizzer da chant 2022
«Scuntrada» è il moto dal festiva. «Nus essan persvas, ch’il chantar n’è betg mo saun, dentant er, ch’el collia», ha ditg Guido Helbling, il president da la cumissiun da musica dal FSC’22. Concerts da scuntrada, inslas da chant per in concert spontan e mintga saira in chantar communabel en ina gronda tenda da circus èn mo intginas da las pussaivladads da sa scuntrar e da chantar ensemen. Er tar las represchentaziuns tar la giuria èn plirs chors al lieu. Il songbook dal FSC’22, ch’è plain chanzuns da tut las parts da la Svizra e che cuntegna perfin in imni dal festival cumponì aposta per la festa, porscha a chantaduras e chantadurs las chanzuns latiers. Las chanzuns vegnan duvradas tar il chant communabel sco er tar ils concerts da scuntrada. Mintga chor participant survegn ina versiun PDF dal songbook e registraziuns da las chanzuns.
L’emprima sonda cumenza il festival cun ina gronda show d’avertura, cun ina projecziun visuala davart il tema tradiziun e modernitad. Latiers Guido Helbling: «Tuts ensemen duain star sin il palc, dal chor d’uffants fin al cor viril, da bandierel fin tar la Cussegliera federala, che vegn speranza er ad esser là». Atgnamain ha il OK vulì envidar chors da tut ils continents. Ord motivs ecologics e finanzials han ins dentant sbittà quell’idea. Ils meds finanzials che na vegnan betg duvrads per quai, vegnan investids en concerts spezials, ch’han lieu tutt’emna. Tranter auter datti d’udir il ensemble brit «Voces 8», ils ensembles enconuschents «Bliss» e «Heimweh», sco er chors svizzers extraordinaris sco «coro calcantus» u il «Chor Svizzer da Giuvenils». Nov è er ina gronda selecziun d’ateliers. Ils 25 ateliers tractan numerus temas: chant gregorian, circle songs, chors da show u jodlar.
Annunziar concerts da festa
Tar la davosa festa da chant 2015 a Meiringen, eran ils concerts da festa dals chors participants in grond success. Il OK vul cuntinuar cun quai. Mintga saira duai dar fin otg concerts en ils differents locals. Guido Helbling spera, «ch’ils chors sa mettan ensemen e creeschan in concept original davart in tema interessant u ch’els elavureschan ina choreografia». Fin ils 31 da schaner 2021 pon chors s’annunziar cun lur concept.
Collavuraziun cun il 8avel Festival svizzer da chors d’uffants e giuvenils SKJF a Winterthur
Durant il medem temp sco il FSC’22 ha lieu durant Ascensiun (26 fin 29 da matg) a Winterthur il 8avel SKJF-festival. Winterthur è mo 35 minutas cun il tren davent da Gossau, e quai nizzegian ils dus festivals cun activitads communablas. Tranter Gossau e Winterthur datti per exempel in «tren da chant» cun concerts. En furma d’in «puzzle da chors» preparan ils chors da tut las generaziuns e da tut las regiuns parts da puzzle, en furma da chanzuns. Quellas vegnan represchentadas durant ils festivals. Concerts ch’han lieu il medem mument, vegnan emess, da la Radiotelevisiun Svizra SRF, live tranter ils differents concerts. Chors d’uffants pon profitar dad ina carta fermamain reducida per il FSC’22 u da purschidas spezialas, sco in workshop per uffants e giuvenils.
Lieus da represchentaziun extraordinaris
Per ch’ils chors pon passentar plirs dis al Festival svizzer da chant, han ins sa coordinà cun las organisaziuns da turissem da la regiun e cun las baselgias, per porscher dapli lieus per far concerts. Sin la homepage dal FSC’22 chattan ins interessantas destinaziuns d’excursiun, sco il Rothus a Gonten u la Schellenschmiede a Gossau. Il OK vul porscher als chors la schanza da far concerts en lieus extraordinaris e da chantar durant ils predis en la regiun. Latiers tradescha Guido Helbling: «Nus avain il permiss uffizial da la catedrala a Son Gal, che mintga chor che visita ella, dastga chantar ina fin duas chanzuns en la catedrala».
Infurmaziuns e la pussaivladad da s’annunziar datti sin la pagina dal Festival svizzer da chant FSC’22: www.sgf22.ch.
Jugendchor Speuz, Erlinsbach © Luis Hartl
Isabelle Schmied (Translaziun: Flurin Clalüna)
