Novitads
<< enavos
Forum SKJF
La teoria «Music Learning Theory» da Edwin E Gordon promova la furmaziun da l’udida sur la percepziun musculara da melodias e ritmus. Moviments fluids e Body Percussion interiurisada sustegnan il svilup. Els n’èn nagina funcziun artifiziala, dentant èn els in’expressiun auditiva da la melodia udida, la realisaziun da la «memoria da las musculs».
Concret funcziuna quai uschia: il manader lascha tadlar als scolars adina puspè ina melodia. Cun acziuns variantas durant tadlar duessan ils scolars quasi incorporar la melodia. Exercizis d’udida regulars e durant il medem temp emprender a chapir la musica en il chau, in cumbinaziun cun l’expressiun corporala, scolescha e furma il chantar e l’udida.
Cun numerus exercizis pratics, gieus da armonia e ritmus, han ins fatg diever da la teoria. Dirigents e dirigentas sco er auters interessads per la lavur da chor cun uffants e giuvenils èn stads fascinads.
Il ulteriur punct central dal forum SKJF è stà il parlament SKJF, ch’ha lieu mintga dus onns. Durant quel parlament han ins discutà davart il program Giuventetgna+Musica (J+M), davart la missiva da cultura, davart il nov concept dal Chor da giuvenils svizzer, davart il program EchangeChœurs, davart la Kultur-Legi e davart il studi «Musiklernen in der Schweiz» da la HSLU Musik. Infurmaziuns davart occurrenzas e perfecziunaments en ils chantuns ed infurmaziuns davart il proxim festival da chors d’uffants e giuvenils, ch’ha lieu il 2021 a Winterthur, han finì giu il forum SKJF.
Renate Leu/SKJF
