Pagina iniziala
<< enavos
Novaziuns tar las expertas ed ils experts
En coordinaziun cun la suprastanza centrala ha la direcziun da l’USC nominà – sper Lukas Bolt ch’è commember da la direcziun elegì per il ressort musica – Caroline Meyer sco co-responsabla per il ressort musica. Medemamain ha la direcziun installà la primavaira passada ina nova gruppa da menturs d’expertas e d’experts (pli baud schef-experts). Quai è capità suenter ina lunga procedura d’annunzia e da selecziun. A questa gruppa da menturs fan part:
- Lukas Bolt
- Elisabeth Gillioz
- Caroline Meyer
- Gonzague Monney
- Pierre-Louis Nanchen
- Nicolas Reymond
- Mauro Ursprung
- Martin Zimmermann
Els han l’incumbensa da definir il basegn d’expertas e d’experts per ils proxims onns sin plaun naziunal per ademplir las pretensiuns da las differentas occurrenzas da chor. La gruppa ha er l’incumbensa da nominar las expertas ed ils experts, d’organisar lur accumpagnament e lur furmaziuns supplementaras e dad ir vid la scolaziun da novas expertas e da novs experts.
Las menturas ed ils menturs èn sa preschentads per l’emprima giada il zercladur ed èn tranter auter sa deditgads directamain a la nominaziun nova da las expertas e dals experts svizzers.
Resguardond il dumber d’occurrenzas da chors, la necessitad d’ina regiuvinaziun per garantir la cuntinuitad da la gruppa d’expertas e d’experts en Svizra, il giavisch da collavurar cun collegas da lingua tudestga e franzosa che pon dar novs impuls, divers stgazi d’experientschas sco er resuns da numerus festivals e pliras concurrenzas, èn vegnidas tschernidas var 50 persunas, cun las qualas ellas vulessan collavurar stretgamain.
En vista als criteris ch’èn necessaris per garantir tant la maschaida da la vegliadetgna sco er la coerenza, la coesiun e la renovaziun da questa gruppa n’han betg pudì vegnir mantegnidas tut las persunas ch’èn stadas registradas fin uss sco experts. En quest lieu saja engrazià explicitamain a tut las expertas ed a tut ils experts ch’èn s’engaschads durant onns per part sur mesira, che s’engaschan senza atgna responsabladad per ils chors e che han mess a disposiziun lur cumpetenza e lur temp en buna savida.
Dals experts restants e nominads vegn pretendì bler. In temp da preparaziun cuminaivel per festivals da chant tutga tant vitiers sco era in coaching obligatoric cun ils menturs d’expertas e d’experts, independentamain da la vegliadetgna e d’experientscha. Resuns e cussegls na duain betg mo ir d’experts als chors, mabain viceversa e la qualitad da las expertas e dals experts duai vegnir examinada cuntinuadamain. Almain ina furmaziun supplementara per onn (i vegnan organisadas en tut la Svizra mintg’onn 4-8 purschidas) è obligatorica ed in’activitad regulara vegn spetgada e coordinada da las menturas e dals menturs.
L’onn 2026 vegn elavurà ina scolaziun per novas expertas e novs experts e probablamain cumenzain nus vers la fin da l’onn proxim cun emprimas candidatas ed emprims candidats.
Ultra da quai lavuran ils menturs, en stretga collavuraziun cun la direcziun vi d’in concept e reglament per la Concurrenza svizra da chors, resguardond numerus debriefings sin tut ils stgalims organisatorics suenter l’ultima realisaziun a Cuira.
Tge munta quai uss per organisaturs?
Organisaturs da festivals da chant vegnan supplitgads dad adina sa metter ordavant ed a temp en contact cun Caroline Meyer u Lukas Bolt. Ils dus co-manaders da las expertas e dals experts coordineschan las acziuns per pudair garantir caracteristicas da qualitad menziunadas survart. Natiralmain succeda quai en dialog. Els preschentan gugent differents models, cusseglian en la planisaziun musicala e resguardan giavischs.
Lukas Bolt
