Pagina iniziala
<< enavos
In Chor per persunas sur 60: Il Chor Sviz Dador 60+ - in model da success
1. Vid tge project vegn actualmain lavurà?
La proxima prova ha lieu proxima gievgia, là vegn il dirigent a preschentar il proxim project. Jau suppon che nus vegnin ad enramar il cult divin da Tschuncaisma, ensemen cun in organist e musicist da corp ed olma enconuschent. Quai vegn segir interessant da lavurar ensemen cun in profi. Normalmain chantain nus surtut en chasas d’attempads davant in public pitschen.
2. Co ston ins s’imaginar las provas en voss chor? Tge è auter, e tge è sco tar mintga auter «chor normal»?
Auter è segir che nus sesain durant chantar, che nus na stuain betg chantar ordador, che nus na stuain betg savair leger notas e che las chanzuns èn per regla relativ simplas. Nus chantain bleras chanzuns svizras, dentant er da numerusas autras linguas.
3. Tge impurtanza ha la furmaziun da vusch tar Vus?
Il dirigent metta grond pais sin la furmaziun da vusch. Surtut tar il sopran è quai impurtant, per ch’ils tuns vegnan bain e ch’i na sgrizia betg. Cun la vegliadetgna (jau na ma sent betg veglia, jau sun dentant er 73 onns veglia) è er la respiraziun impurtanta. Perquai survegnin nus buns tips durant las provas.
4. Il chor ha ina grondezza remartgabla! Co pon ins declerar il success da quest model da chor?
Nus avain bleras chantaduras e chantadurs cun blera experientscha ch’han avant gia chantà en chors u che chantan anc adina là. Persunas che cumenzan a chantar sa sentan uschia pli segira e survegnan sustegn dals auters. Quai sbassa il stress. Plinavant han lieu las provas la damaun en ina chasa da scola ch’è bain liada vid il traffic public ed en vischinanza datti plazzas da parcar. Plinavant porta mintgin ina tavla dal num, uschia ch’ins na sto betg emprender a la sperta tut ils nums. Er quai reducescha probablamain il stress.
Il dirigent schlia blers problems cun umur, e nus stuain adina puspè rir. Uschia è la gruppa adina da buna luna e nus ans legrain adina da vegnir ensemen.
Jau pens che la direcziun dal chor ha ina grond’impurtanza per che la glieud sa senta bain. Er en la suprastanza avain nus ina gruppa buna ed agreabla. Il president maina nus fitg bain e nus avain in contact fitg respectabel.
La glieud en il chor han blera experientscha e cun quai er blera sabientscha da la vita. Cun quai pudain nus er sa vilentar davart chaussas che nus n’avain betg gugent. Dentant per il solit savain nus er che quai n’è betg necessari. «Pazienza da la vita», pudessan ins numnar quai.
5. Avais vus er gia studegià da partir il chor u vulais vus chantar vinavant cun uschè blera glieud?
Durant il temp da corona – cura che nus pudevan puspè chantar – avain nus partì si il chor, per betg avair memia blera glieud en ina sala. Nus eran generalmain fitg precauts cun purtar mascrina fin tar la sutga e cun dischinfectar ils mauns.
Cura che la 100avla persuna è rivada tar nus, avain nus curt discutà davart partir si il chor. Quai è dentant spert vegnì sbittà. Cun uschè blera glieud tunain nus meglier, nus avain intgins buns bassists ed uschia fai grond plaschair da chantar.
6. Tge stuess in’autra uniun chantunala da chant resguardar, sch’ella vul sez crear uschè in chor?
Qua la resposta dal president
La prova duess avair lieu l’avantmezdi ubain il suentermezdi, cun quai che blers da la gruppa da vegliadetgna 60+ na vulan betg far provas la saira. Perquai èsi fitg impurtant da chattar ina dirigenta u in dirigent ch’ha temp durant il di. Plinavant dovri in local da prova ch’è grond avunda. Plinavant dovri ina suprastanza che maina il chor, fertant ch’ins fundescha in’uniun.
7. Sco che Vus scrivais, gioga er la part sociala ina rolla impurtanta. Pudais Vus raquintar in pau davart quai?
• Il local da prova è in restaurant enconuschent a Siebnen, nua ch’intginas chantaduras e chantadurs vegnan ensemen suenter la prova per mangiar gentar.
• Suenter ils concerts en chasas d’attempads (ch’han lieu mintga trais mais) datti adina in apero. Bleras persunas van a quel ed uschia vegn discutà e rinforzà ils contacts socials.
• La fin da l’onn da program, avant las vacanzas da stad, fain nus in viadi cun in gentar communabel. Tar quel vegn qua u là ballà ensemen, i dat sketschs, nus chantain e fain musica. Natiralmain dovri perquai in restaurant ch’ha avunda plazza.
• Ina giada ha la radunanza generala gì lieu a la gievgia grassa (en il chantun Sviz è il tschaiver la stagiun la pli impurtanta). La suprastanza ha lura manà atras la radunanza costumà sco hippies, intgins commembers èn er vegnì mascrads.
• Per la davosa prova avant Nadal han las dunnas fatg biscuts/creflis/tustgets/momas/papas/grassins e fatg punsch. Uschia vulevan ellas dir grazia als umens, che mettan adina si e rumeschan davent las sutgas
8. Datti anc insatge che Vus vulais dir che schai a cor a Vus?
Tar nossa vegliadetgna tutga er la mort vitiers. La suprastanza emprova lura dad ir tar il funeral. Durant il temp da corona n’èra quai natiralmain betg pussibel.
Sche chantaduras e chantadurs vegnan malsauns na pon els betg pli chantar. Noss president è lura fitg attentiv e dumonda adina, sch’i na va betg bain cun insatgi. Durant il temp da corona, cura che nus n’avain betg fatg provas, avain nus da la suprastanza anor telefonà a las chantaduras e chantadurs per discurrer in pau.
chor60plus.ch
Isabelle Schmied (trad.Flurin Clalüna)
