Tge l'Uniun svizra dals chors?

L'Uniun svizra dals chors (USC) è l'organisaziun tetgala da las societads ed associaziuns da chant chantunalas e regiunalas da caracter profan da tut la Svizra.

Ella è vegnida fundada il 1977 cun la reuniun da l'Associaziun federala da chant (fundada il 1842; chors virils), l'Associaziun svizra da chors da dunnas e l'Associaziun svizra da chors maschadads. Ella cumpiglia oz var 1480 chors da tut ils geners e dumbra circa 42 000 chantaduras e chantadurs (chors virils, chors da dunnas, chors d'uffants e da giuvenils e chors maschadads).

Integrada sin plaun naziunal ed internaziunal

Per realisar meglier sias finamiras collavura l'USC cun autras uniuns sco la Federaziun svizra Europa Cantat, l'Uniun Svizra per la Promoziun da Chors d'uffants e da giuvenils, A Coeur Joie, las associaziuns da chant da las duas Baselgias grondas, las scolas da musica, giuventetgna+musica e la Conferenza svizra da la musica da scola CMS. L'USC è commembra dal Cussegl svizzer da la musica, da l'Uniun da las federaziuns choralas europeicas AGEC e da la Federaziun internaziunala per la musica chorala FIMC.

Tge intent ha l'USC?

L'uniun promova e sviluppa il chant en Svizra. Ella sustegna en collavuraziun cun las associaziuns chantunalas las activitads dals chors

L'USC

  • s'engascha per la scolaziun ed il perfecziunament da dirigentas e dirigents, d'expertas ed experts;
  • sa metta en per la creaziun e la derasaziun da nova litteratura chorala, per exempel cun organisar concurrenzas da cumposiziun e cun edir ils carnets da chor «Choralia Helvetica»;
  • sustegna ils chors commembers (contract collectiv da la Suisa, contracts e statuts da model, fegls d'infurmaziun);
  • s'occupa da la promoziun da la generaziun giuvna (subvenziun u patrunadi, inscunters chantunals da chors da giuvenils, Chor svizzer da giuvenils, emna da l'Eurochor);
  • edescha la revista svizra da chors «chorus» en las quatter linguas naziunalas;
  • represchenta ils interess dal chant profan da chors da laics en la politica culturala svizra e tar la Suisa;
  • sustegna occurrenzas da chors naziunalas: Festa svizra da chant, Concurrenza svizra da chors, etc.;
  • promova il barat tranter ed il contact da tut las culturas e linguas da la Svizra.