Novitads
<< enavos
Concert da benefizi «Grischun cunter Malaria»
Il rumantsch stat en il center dal concert da benefizi «Grischun cunter Malaria». Il retgav dal concert dals trais chors grischuns Cantus Firmus Surselva, Incantanti e Chor viril Ligia Grischa va a favur da la fundaziun «Against Malaria Foundation». Il retgav impunda l’organisaziun per reparter millis da raits da mosquitos stabilas a famiglias povras a Malawi e Ghana.
Il stgazi da las chanzuns rumantschas na vegn betg sulettamain apprezià en il Grischun, el chatta er bun’accoglientscha en la Bassa. Trais chors grischuns, dus chors da chombra ed in dals gronds chors virils da vallada, sa preschentan cun chanzuns a-capella en il KKL a Lucerna. Cantus Firmus Surselva, Incantanti ed il Chor viril Ligia Grischa laschan resunar chanzuns da betg main che quattordesch cumponists rumantschs. Dal program da concert fan part intgins «classichers» tranter auter da Robert Cantieni e Nuot Vonmoos ed ovras da cumponists arrivads sco Gion Antoni Derungs e Tumasch sco era Benedetg Dolf. En pli preschentan ils chors er chanzuns da cumponists contemporans sco Gion Andrea Casanova e Flavio Bundi. Chanzuns ord autras culturas cumpletteschan il program varià.
Malaria è in dals motivs principals per la mortalitad dals uffants en pajais en svilup. Mintg’onn moran anc adina passa 800 000 uffants sut 15 onns en consequenza da la malaria. Per cumbatter la malaria datti per l’ina programs da vaccinaziun, per l’autra vegnan distribuids raits da mosquitos stabilas a famiglias povras. Questa mesira na custa betg bler ed ha bun effect. La fundaziun «Against Malaria Foundation» cumpra talas raits e las distribuescha. Il custs per rait munta a strusch quatter francs per toc. Il sustegn da la fundaziun Lamprecht-Steiger per quest concert da benefizi pussibilitescha als organisaturs da metter a disposiziun tut las entradas dal concert ad «Against Malaria Foundation».
L’anteriura cussegliera federala Eveline Widmer-Schlumpf moderescha la gronda sairada da concert a Lucerna.
Du 28 da matg, 11h, KKL Lucerna (sala da concert)
Entrada: CHF 50 (pretsch unitar) / giuvenils CHF 20
Prevendita: KKL Kartenverkauf / www.kkl-luzern.ch / telefon 041 226 77 77
F. Frey / Übersetzung A. Gabriel
