Pagina iniziala
<< enavos
Faleraconta 2017 – La 45avla Festa da chant districtuala Surselva a Falera
L’entschatta a la 45avla Fiasta da cant districtuala Surselva han il Chor viril Ligia Grischa ed il cantus firmus surselva dà il venderdi saira cun in concert d’avertura impressiunant. La sonda a bun’ura èn lura ils 31 chors cun lur bandieras marschads festivamain en la vischnanca da Falera.
Lur chanzuns da concurrenza han ils chors dà en la bella baselgina veglia da s. Rumetg ed en la baselgia parochiala a mez vischnanca. Otg expertas ed experts han giuditgà las producziuns e dà als chors in rapport a bucca e sche giavischà exprimì in predicat.
13 dals 28 chors che han laschà giuditgar han retschet il predicat «excellent». Quai che conferma la buna qualitad dal chant en la Surselva. Sin la tribuna en il «vitget da cant» èn intgins chors sa preschentads al grond public da festa cun preschentaziuns libras e divertentas. Il vitget da cant ha er servì per alimentar las visitadras ed ils visitaders cun differentas tratgas e bavrondas. L’entira vischnanca da Falera è sa gidada.
Suenter ils dus concerts da festa en las duas baselgias cun ils chors cantus firmus surselva e kontra.cant han ils 110 uffants dals dus chors d’uffants Surselva e Sumvitg introducì l’act festiv. Armon Caviezel, il schefexpert, ha dà in bun parairi als chors da la Surselva. El ha ludà la buna qualitad da las producziuns e renconuschì il fatg ch’ils chors han tschernì per gronda part ovras rumantschas ma er ch’intgins chors han ristgà a prender cumposiziuns novas e nunusitadas.
Cun la 45avla festa da chant ha il District da cant Surselva en il medem mument festivà ses giubileum da 150 onns. Il president dal district, Ewald Vinzens, ha pudì preschentar in cudesch ed in disc a chaschun dal grond giubileum. L’ovra ch’è vegnida redigida dad Erwin Ardüser preschenta ils actuals ed anteriurs chors dal District da cant Surselva en tun, pled e maletg. Il cudesch preschenta en pli detagls interessants ord l’istorgia dal chant e dal district a maun da festas da chant e cun bleras anecdotas interessantas.
Tgi che ha manchentà questa grondiusa festa po consultar intginas impressiuns sin la pagina d’internet http://www.rtr.ch/cultura/musica/festas-da-chant-e-musica/festas-da-chant/2017-falera-conta-2. Radiotelevisiun Svizra Rumantscha ha accumpagnà la festa e registrà tut las producziuns en tun e maletg.
L. Bärtsch
