Las festas da chant èn inscunters musicals

Savens è la participaziun ad ina festa da chant sin nivel regiunal u chantunal il punct culminant dal program annual d'in chor. Plinavant ha lieu circa mintga otg onns ina Festa federala da chant, durant la quala s'inscuntran chantaduras e chantadurs da tut la Svizra e da l'exteriur.

Il 2015 ha lieu a Meiringen la proxima Festa federala da chant. Il 2008, a chaschun da l'ultima Festa federala da chant a Weinfelden, èn stads da la partida prest 500 chors cun passa 15'000 chantaduras e chantadurs: ina grondiusa occurrenza ch'è restada a blers en buna memoria e che influenzescha anc oz divers projects. Las Festas federalas da chant precedentas en il Vallais (2000), en il chantun da Lucerna (1991) ed a Basilea (1982) han medemamain gì in grond resun.

Era Festas chantunalas da chant èn grondas occurrenzas che attiran numerus chors che sa preschentan a la giuria d'experts, taidlan vicendaivlamain las represchentaziuns e passentan ensemen in di inspirant. Ils chors obtegnan dals experts in resun constructiv per lur represchentaziun musicala e (sin giavisch) in predicat che po tanscher dad «excellent» fin a «nausch». Questa discussiun d'experts è savens ina gronda motivaziun per las chantaduras ed ils chantadurs da s'occupar a moda spezialmain intensiva cun la litteratura e da preschentar il chor da sia meglra vart.

Dapi in tschert temp vegnan festas da chant concepidas sco veritabels festivals cun concerts d'atelier, d'inscunter e da gala. Tradiziunalmain fan part dal program era cortegis, pleds, acts festivs, tschaveras cuminaivlas, concerts da festa, represchentaziuns da chors furmads aposta per l'occurrenza e programs da divertiment per ils participants e per il public.

Festas da chant porschan delicatessas per amaturs da musica. Ellas pussibiliteschan però cunzunt a las chantaduras ed als chantadurs d'inscuntrar persunas cun ils medems interess, da tadlar auters chors e da scuvrir novas chanzuns.

Las proximas festas da chant chatt'ins en las occurrenzas

Festa chantunala a Balsthal.